y broses

Y cam cyntaf yn y broses yw codi’r ffôn, neu anfon e-bost, i wneud ymholiad cychwynnol. Ar ôl i chi wneud hyn, mae eich taith wedi cychwyn.

Byddwn yn cymryd eich manylion hanfodol er mwyn i ni allu dechrau deall eich sefyllfa. Byddwch chi’n cael pecyn gwybodaeth, sy’n egluro sut beth yw bod yn ofalwr maeth.

Ar ôl i chi gysylltu â ni am y tro cyntaf, byddwn yn dechrau dod i’ch adnabod chi. Bydd rhywfaint o waith papur, yna byddwn yn ymweld â chi gartref neu ar-lein drwy alwad fideo.

Mae’n bwysig ein bod ni’n ffurfio perthynas â chi o’r cychwyn cyntaf, er mwyn i ni allu deall pwy sydd bwysicaf i chi a dysgu am eich cartref.

Rydyn ni’n cynnal cwrs hyfforddi dros dri diwrnod er mwyn i chi gael y sgiliau a’r wybodaeth sydd eu hangen arnoch i fod yn ofalwr maeth. Byddwch yn cael cyfle i gwrdd ag aelodau o dîm Maethu Cymru Conwy, yn ogystal â gofalwyr eraill yn y gymuned, mewn amgylchedd hamddenol.

“fe wnaethon ni gwrdd â llawer o bobl wych rydyn ni bellach yn eu hystyried yn ffrindiau ac rydyn ni’n helpu ac yn cefnogi ein gilydd pan fydd angen hynny arnon ni” – Gofalwr Maeth, Conwy

Yn ystod y cam asesu, byddwch chi’n dysgu beth fydd maethu yn ei olygu i chi. Mae’n hollbwysig cofio – dim prawf yw’r asesiad hwn; mae’n ein galluogi i ddeall eich teulu ac yn gyfle i chi a’ch teulu ofyn cwestiynau.

Gweithwyr cymdeithasol sy’n cynnal yr asesiadau, gan ystyried cryfderau a gwendidau teulu.

Mae gweithwyr gofal cymdeithasol ac aelodau annibynnol yn aelodau o banel Maethu Cymru. Maen nhw’n gwerthuso eich asesiad o bob ochr ac yn edrych ar bob gofalwr maeth yn unigol.

Bydd y panel yn cyflwyno argymhellion ynghylch beth allai weithio orau ar gyfer eich sefyllfa bresennol.

Mae’r cytundeb gofal maeth yn nodi beth mae bod yn ofalwr maeth yn ei olygu. Mae’r cytundeb ysgrifenedig hwn yn nodi cyfrifoldebau o ddydd i ddydd, ynghyd â’r gefnogaeth a’r arweiniad ehangach y byddwch yn eu darparu – yn ogystal â sut byddwn yn eich cefnogi ar eich taith.